بروجكت جينزو

Mon, 08 Jun 2026 00:00:00 +0000

انا دابا فالقطار من اسطنبول للانقارة او متاكد انني المغربي الوحيد فهاد القطار، في اطار توتيق الاحدات و حركة الخير في الشير، شريت واحد الدفتر صغير نكتب فيه شي نويطات طاحو عليا هاد الايام.

مرعفتش واش غير انا ليكتجيني فشكل العدد ديال الاخبار و النيوز لكنعيشو كل نهار، واقيلا حيت شحال هادي ماكنتش المعلومة ساهلة، اولا واقيلة حيت المواضيع لي كانو شحال هادي كان فيهم واحد النوع ديال الاستقرار و المرجعية فالتطور ؟ دابا كل نهار مالين الإآي لايحين شي لعبة جديدة.

ها التطور السريع واحد من الاسباب لي خلاني نكتب، شحال هادي كنت قريت واحد لارتيكل على كيفاش الدماغ ناضي فالتحليل و عيان فالسطوكاج (اييه بحال الرام). و دابا وليت كانبارطاجي شنو كنكتب و لي عجباتو شي بياسا الله يربح.

ملي كنت صغير كانت كاتجيني الدارجة ديالنا لغة غريبة(معرفتش واش اصلا مصنفة لغة). تاكفاش لغة كتكتب بالحروف العربية و اللاتينية، و الارقام ؟؟ كانديرو تصفية الحسابات وسط الهدرة. الفكرة و ما فيها هي انه كانت كاتجيني الدارجة ولا غاع العربية ماشي اختيار مزيان باش نعبر، مانكدبش عليك معرفتش علاش، ولكن كان صعيب عليا نقول ولا نكتب شي نويطات من غير الانجليزية.

اضافة الى ذلك، حتى انا كنت من الناس لي صافي ضربو السلام للغة الام او بدات كاتبان ليا العالمية و قطار العولمة و التحدث مع الغير.

دابا غاتجي غاتقوليا كيفاش بلان هادشي لكنقرا دابا ؟ واش نتا انسان متناقض ؟ غانقولك تهنا و رتاح انا نشرح ليك

الفكرة هنا هي انه مع الوقت و التجارب لي عشت، او ناس لي تلاقيت، ولات كاتبان ليا العربية و الدارجة كوول، نعتارف انني كانتعسف عليهم شوية و كانقول “ايفيكتيفمون” بزاف، ولكن هادا جزء من اللحاق بقطار العولمة الذي لا ينتظر. هضرت مع ناس اجنبيين مابغيينش لونجلي تقصي الديسكور ديالهم، و هضرت مع مغاربة خلاوني نشوف الدارجة شي حاجة لي ناضية، ولي ولات فغيمون كاتبرد ليا الغدايد فالكتابة و التعبير.

المشكل لي يقدر يبانليك دابا هو كيفاش بحكم انك جزء من التيك كوميونتي غاتوصل العالمية، و كيفاش الناس ديال سيليكون فالي غادي يقراو هادشي لي كتكب، او هنا غاندورو نشيوفو فالإآي، حيت انا مانويش ندير خدمة مضويلة، غنغوليه تو سابلومون يترجمها او كيفما جات، هاكا انا نركز على الكتابة و هو يدير الاعمال الشاقة و المياه ترجع الى جواريها.

للناس لي فاهمين الكونصيبط، هادا هو جينزو، سلايفر بالعربية، الناس لي مافهمينش سيرو تفرجو ف يو غي يو، طيليشارجيت شي حلقات كاندوز بيهم الوقت هنا.

فهاد الصدد غايولي خاصني نقلب على شي إآي ناضي فالدارجة.هاد لاغتيكل و هاد القرار كامل السبب ديالو انني قنطت فتركيا حيت درت عشر ايام و توحشت دارنا و بلادي، وهادشي واقيلا خاصو تاهو اغتيكل ديالو.

Jinzo on Fluka ~$_

بروجكت جينزو